東亞銀行 又瀨嘢 :有可能瀨咗乜嘢?

東亞銀行-瀨嘢-min

東亞銀行 較早前出咗公告,指中國醫療科技嘅清盤人,已經搵咗律師出票告佢地,指 東亞銀行 喺處理2006年至2009年高層果啲挪用公款交易果陣,未有審查,不聞不問,所以要 東亞銀行 同埋中國銀行兩間往來銀行負責。

東亞銀行 如果咁都中就真係大劑

正常嚟講, 東亞銀行 唔應該要負責任,一般呢啲大額過數,其實收款銀行要證明到啲錢係乾淨嘅,而 東亞銀行 作為放錢嘅銀行,見到公司有文件,例如合約,或股東決議,有公司獲授權人士簽字同公司蓋章,咁就會放錢,果單交易係唔係涉及虧空公款,銀行又唔係公司高層啲人,識條鐵咩,所以表面嚟睇,呢單官司聽落唔合理。香港又唔係美國,乜都可以告得一餐。大家要記住,香港打官司,係未見官先打八十大板,要入紙就要磅咗律師費先,唔同美國,律師可以透過瓜分原告嘅賠償,有錢齊齊分。所以照理,中國醫療科技嘅清盤人,唔會無喇喇就走去告 東亞銀行 。清盤人打官司,如果唔係有把握,點會咁追呀,清盤人想自己筆清盤人費用收唔番咩,本來做清盤人就有相當風險嘅一件事嚟。

只不過,中國醫療科技並唔係香港上市,亦唔係一間單純嘅中國或香港公司,呢間係美國上市嘅美國公司,啲錢係嚟自可換股債券集資嘅錢,美國嘅證券法律,一向好保護小股東權益,果啲銀行戶口好可能係有特殊條款,動用款項果陣,好可能要根據美國果面嘅要求作出唔同嘅審查,唔可以單係因為有齊公司大粒佬簽字,咁樣就可以過骨,咁就真係瀨鑊甘,咁就變咗香港啲銀行,唔熟美國果啲規矩,懵盛盛走去當果啲美國公司戶口係一般香港公司戶口咁做,喺香港,銀行好多嘢唔駛上身,但美國係要求上身,因此,清盤人反而就搵銀行嚟落鑊,因為銀行開戶果陣,好可能知道呢啲戶口,要依據美國嘅法律要求嚟做嘢,唔係根據香港果啲規矩嚟做嘢。

所以呢單官司結果點都好,香港啲銀行日後處理點大額轉帳,都會變得好小心謹慎,因為做少一個step,都可能招惹官司,呢啲官司就算贏咗都未必收番足堂費,但搞到自己一身蟻,你估好好玩咩。

王冬勝 做財爺?夠能力咩?

王冬勝-min

江湖傳聞, 陳茂波 雖然掟咗兩百幾萬幫財政司司長官邸裝修,但睇嚟享受果個唔係佢,傳聞其中一個熱門人選,係依家HSBC香港嘅主席,兼HSBC全球副主席 王冬勝 。 王冬勝 好快由匯豐大班更上一層樓成為財爺,都咪話唔犀飛利。

王冬勝 真係夠料做財爺?

只不過,喺中環內外,對 王冬勝有無足夠料子做財爺十分之懷疑,首先, 王冬勝 無論喺做渣打期間,定做HSBC期間,都表現平平,除咗係咁炒人交人頭cut budget,乜都唔識,好似啱啱HSBC又炒咗百幾件IT,咁成日炒啲IT人,咁HSBC Payme 推出果陣鑊味濃,大家咪知點解囉。新特首唔係話要理財新哲學嘅,你搵個喺成個中環以炒人同孤寒出名嘅表現平平大班做財爺,咁點解大家唔選曾俊華做特首,至少曾俊華做咗財爺咁多年都成績好好,又慳錢,曾俊華有必要果陣,可以兼任財政司司長,咁仲慳好多喇,你話係唔係?如果堅搞所謂理財新哲學,不如由精於劏房之道嘅陳茂波出手去做好過喇。同埋二百幾萬裝修官邸咁豪,同林鄭月娥真係一拍即合。

另一方面, 王冬勝 嘅判斷能力都好有問題, 王冬勝係成日主張港幣同人民幣合併果條友,佢認為中國經濟咁強,用人民幣咪得囉,駛鬼保留港幣。但呢排人民幣匯價好似過山車咁嘅情況話俾大家聽, 人民幣 依家根本仲係好唔穩定,相反,依家港幣喺聯繫匯率嘅支持下,十分之穩陣。以前自由行,啲中國遊客一般會將喺找贖果陣收到嘅港幣換番做人民幣,因為揸港幣係會蝕。但依家,好多中國遊客都會保留找贖果陣嘅港幣,因為港幣即係美金,每張港幣都有至少十足嘅美金支持,揸港紙等於揸美金,所以有機會攞到港紙都唔放,恢復番開放改革前期嘅情況。你依家話香港改用人民幣,我相信你唔只得罪香港市民咁簡單,係連揸緊港紙啲同胞都一併得罪,屆時林鄭月娥真係多得你唔少。

其實最好嘅財政司司長人選,係傻強陳家強教授,用番薯片嘅財政政策,以不變應萬變最實際,依家外圍隨時打大風,你林鄭月娥無啦啦依家要換屋企隻窗做乜,想連自己都吹埋出屋咩。

選民登記 咁漏料玩殘全港銀行

選民登記-洩漏-min

擺喺亞洲博覽館後備特首選舉會場,裝住 選民登記 資料嘅兩部Notebook,竟然被人偷咗,依家全香港人都心驚驚自己啲資料唔知去咗邊。只不過,對銀行同財仔嚟講,呢件事簡直係大惡夢,以後都唔知點批啲客嘅身份證資料。

依家漏出嚟嘅 選民登記 資料,有身份證號碼,中文商用電碼,中英文名、出生年月日,睇起嚟好似好簡單咁,但對假證黨嚟講,呢啲資料其實好夠攞嚟做假身份證,無錯,只要整張似層層嘅假證,相係Match番行使假卡果條友,但身份證號碼、出生年月日、中文商用電碼、甚至地址呢啲料係match選民登記嘅,令正面信貸資料庫唔覺呢啲料係流,然後呃走銀行啲貸款,銀行仲唔被啲賊當提款機咁用,一係政府幫全香港人換晒啲身份證號碼,但呢項工程一定係惡夢級工程,全香港銀行實問候到你嘅林特首嘅當選票數一樣為止,咁你可以點算?

所以依家銀行有啲唔駛見樣就可以批貸款,齋用手機SMS可以申請貸款,呢啲嘢可能無銀行同財仔咁玩,因為無人敢估啲資料係嚟自果個真人,定係騙案集團啲車手。依家係政府無任何website,可以用嚟俾銀行透過閱讀智能身份證上嘅晶片資料,知道張身份證堅定流。如果政府肯提供呢類服務仲好啲,最多要個客申請嘢果陣,攞個身份證俾個card reader 讀一讀,再連接政府個網站核對身份證真偽,咁假咭黨攞晒啲資料都惡唔出樣。只不過,呢個政府肯做呢件事,啲賊佬就唔會對選民登記電腦有興趣喇。

仲有,亞洲博覽館嘅保安,其實係好有問題,近年唔少trade show都係亞洲博覽館舉行,去年四月電子展就試過有參展商被人偷嘢,跟住去年十月打完八號風球,又有人偷嘢,仲有八號風球,照計無人咁夠薑入機場食強風,都有人偷嘢,根本果度就係有賊嘅地方,政府以為啲嘢上咗鎖好安全,我睇嚟係香港差佬太削,亞洲博覽館有賊一直都捉唔到,就真係太歲頭上動土,連政府嘅電話都偷埋,然後搏一鋪,睇吓啲資料賣唔賣到都好。我唔信啲俄羅斯黑客爆唔掂部機啲資料。所以呢次真係銀行嗌救命,搞貸款審批果啲自己執生。

林鄭月娥 連Basel III都未搞清楚就學人亂答

林鄭月娥-Basel III-min

對中環客嚟講,政治好遙遠,雖然未到我討厭政治,但興趣唔大,有時間都留番搵銀。不過,如果做官果啲,啲金融政策亂咁嚟,但知啲唔知啲,咁係關我事嘅,因為會影響我中環客嘅飯碗。 林鄭月娥 喺特首選舉電視辯論,將Basel III 協定亂答一通,就係例子。

乜叫 Basel III 協定,其實 林鄭月娥 嘅軍師白頭任任志剛應該好熟書,呢樣嘢係金管局管,點會 林鄭月娥 答到烏厘單刀至得。所以 Basel III,就係進一步提高 Tier-1嘅資本要求,喺2019年,即係大約年半之後,達到百分之六。所以 Tier-1 capital,就係銀行普通股本,再加銀行自己嘅保留利潤合計出嚟。另外再加2.5%嘅緩衝資本,即係銀行要準備成百分之8.5資本出嚟擺喺度唔借得。

喺辯論會問 林鄭月娥 果條友,應該係銀行行家,本來想砌副好牌俾 林鄭月娥 上,點解 林鄭月娥 答到一舊舊,話乜嘢成立金融委員會,關金融委員會叉事咩。依家問題係,如果政府2019年要如期實施 Basel III,香港啲銀行夠唔夠料應付先。

依家中環客睇,啲大銀行其實普遍都合符要求,中銀賣咗集友同南商,一方面要保留多啲現金用嚟應付 Basel III要求,另一方面,集友同南商喺新股東注資下,會符合 Basel III,你叫中銀獨力去應付,就未免太吃力。所以如果 林鄭月娥 熟書嘅,其實答香港普遍啲銀行,都有盡力符合呢項要求,上任後會責成金管局儘早進行壓力測試,仍然無法合資格嘅銀行,安排協助他們喺資本市場集資,或者轉讓股份,但相信以香港金融市場嘅狀況,應該可以應付。咁答咪又熟書又得體,但結論係,曾俊華未必好熟書,但你 林鄭月娥 一定唔熟書。

所以有啲奶粉仲夠薑用呢題話奶媽KO咗薯片,呢啲友仔係唔識嘢兼發緊夢,大佬,奶媽就係無溫書,結果咪答非所問囉,林鄭月娥仲牙斬斬話搵高人補習就可以搞得掂,如果咁都搞得掂,我中環客咪唔駛咁辛苦考CFA喇,人人都可以無牌從事金融業務都得,金融呢樣嘢,唔係得個吹字㗎,好心 林鄭月娥 虛心啲喇。

有線寬頻 停有線電視係咪要賣殻?

有線寬頻

九倉終於宣布唔會再射水俾 有線寬頻 ,亦無人會買 有線寬頻 ,呢一點,中環客理解,依家樂視搞到啲足球賽事轉播費係天價,而依家做寬頻,又要面對HKBN同HKT兩間嘢嘅競爭,電訊市場都無肉食,你話邊個想做落去。

有線寬頻 有人話個先天不足係入屋唔係用光纖,我中環客唔同意,喺美國,同 有線寬頻 一樣用DOCSIS技術嘅寬頻公司,一樣好把炮,最把炮果間,就係依家擁有最大免費電視台NBC嘅Comcast,依家 Comcast 幾勁,唔駛鋪光纖入屋,用最新嘅DOCSIS 3.1技術,一樣係Gigabit寬頻入屋,唔輸俾AT&T同Verizon兩間大型怪物電訊公司,AT&T同Verizon都係同樣擁有4G LTE網同光纖網,大城市用光纖,市郊就用4G LTE入屋。

無錯,問題亦係 DOCSIS 3.1度,依家有線寬頻,要投資幾多錢喺 DOCSIS 3.1升級度,又要搞免費電視,邊有咁多錢搞咁多嘢,如果收費電視係長期無前景,點解唔轉型為一間純電訊公司?但

不過我中環客睇,無論載通打算叫路訊通舉白旗,定係 有線寬頻 舉白旗,其實兩個目的都好似,就係停晒啲蝕錢業務,洗靚個殻後賣殻。如果 有線寬頻 唔玩收費同免費電視,就剩番個電訊網絡,電訊網絡係容易定到價,甚至有線個網行咗咁多年,其實乜都折舊晒,客戶用緊啲modem亦唔慌值錢得去邊,成個殻賣俾啲要走資嘅公司仲好,特別依家證監睇住啲新上市公司好似捉賊咁,如果九倉、新地呢啲大企業掟隻殻出街,隨時啲大陸佬肯俾一個好嘅溢價去買個殻返嚟,本來蝕緊錢,依家因注入一啲業務,突然間炒上去嘅話,證監都唔吹得啲新殻主漲架。所以九倉同新地不約而同,長痛不如短痛,反正傳媒生意難撈,不斷斬咗啲業務佢,其實之前新傳媒賣盤,變咗恆大健康產業,依家萬華傳媒被國企收殻進行中,都係玩呢啲嘢啫,只不過,講行動敏捷,楊受成同張曉卿畢竟真係撈傳媒飯,一早已經見勢色唔對做咗嘢,九倉同新地呢啲大笨象,依家至做嘢就真係遲咗少少,不過對股民嚟講無壞嘅。